Hvað á sveitarfélagið að heita?

Merki Betra Ísland.
Merki Betra Ísland.

Söfnun hugmynda um nafn sameinaðs sveitarfélags Blönduósbæjar og Húnavatnshrepps er hafin á BetraÍsland.is. Hún stendur til 31. mars nk. og er öllum opin. Verkefnið er unnið í samstarfi við Íbúar ses. sem sérhæfir sig í rafrænum samráðskerfum og rekur BetraÍsland.is.

Hægt er að skrá sig inn með rafrænum skilríkjum í gegnum Ísland.is eða með nafni og netfangi. Þeir sem það gera fá tilkynningar um breytingar og athugasemdir við tillögurnar. Það er líka hægt að taka þátt nafnlaust og án innskráningar, en þá berast ekki tilkynningar.

Æskilegt er að tillögur séu lagðar fram með stuttum skýringum. Þátttakendur geta líka lýst skoðunum sínum á tillögum annarra.

Heiti sveitarfélaga skulu samrýmast íslenskri málfræði og málvenju samkvæmt sveitarstjórnarlögum, og falla að þeim reglum sem útlistaðar eru í lögum um örnefni og reglugerð um störf örnefnanefndar. Sjá nánar á vefsíðu Örnefnanefndar.

Hugmyndasöfnun mun einnig fara fram í skólum sveitarfélaganna. Þeir sem treysta sér ekki til að nýta rafrænar lausnir er velkomið að koma tillögum á skrifstofur sveitarfélaganna, eða fá aðstoð við að setja inn hugmyndir rafrænt.

Að lokinni hugmyndasöfnun verður farið yfir allar framkomnar tillögur. Undirbúningsstjórnin velur 5-10 hugmyndir sem sendar verða Örnefnanefnd til umsagnar sem hefur þrjár vikur til að skila rökstuddu áliti sínu.

Gert er ráð fyrir að samhliða sveitarstjórnarkosningum í maí fari fram skoðanakönnun um nafnið meðal íbúa. Niðurstöður hennar verða leiðbeinandi fyrir nýja sveitarstjórn sem tekur endanlega ákvörðun um nafn sveitarfélagsins samkvæmt lögum.

Smelltu hér til að taka þátt í hugmyndasöfnuninni á BetraÍsland.is