Sameiningarkosningar fara fram 19. febrúar 2022

Tillaga samstarfsnefndar Blönduósbæjar og Húnavatnshrepps um að kosið verði um sameiningu sveitarfélaganna 19. febrúar hefur fengið fyrri umræðu í báðum sveitarstjórnum. 

Það er álit Samstarfsnefndar að fram skuli fara atkvæðagreiðsla meðal íbúa sveitarfélaganna um sameiningu sveitarfélaganna í eitt. Lagt er til að atkvæðagreiðsla fari fram laugardaginn 19. febrúar 2022 í báðum sveitarfélögunum.

Jafnframt leggur nefndin til að samstarfsnefnd verði falið að undirbúa atkvæðagreiðslu og kynna tillöguna og helstu forsendur fyrir íbúum sveitarfélaganna. Kynningarstarf hefst formlega 8 vikum fyrir kjördag í samræmi við sveitarstjórnarlög, en kynningarefni berst íbúum í janúar og haldnir verða íbúafundir í aðdraganda kosninganna.