Stöðnun er ekki valkostur

Á seinni íbúafundi um sameiningarviðræður sveitarfélaginu í Austur-Húnavatnssýslu sem fram fór laugardagsmorguninn 6. mars mættu um 25 manns, en flestir þeirra voru fulltrúar í samtarfsnefnd eða þátttakendur í starfshópum. Þeim íbúum sem mættu gafst því gott tækifæri til að ræða ítarlega við kjörna fulltrúa og koma sínum sjónarmiðum á framfæri. Auk þeirra fylgdust um 30 með fundinum í streymi á facebooksíðunni Húnvetningur. Þátttakendur og áhorfendur á fyrri íbúafundi, þann 3. mars voru rúmlega 200.

Á fundinum kom fram að umræða meðal íbúanna er að aukast en frekari upplýsingagjöf er mikilvæg, sérstaklega meðal ungs fólks. Mikilvægt er að leiðrétta misskilning og rangar upplýsingar þannig að íbúar geti tekið upplýsta ákvörðun í júní. Fram koma að í apríl og maí verða kynningar á fundum, í prenti og á vefmiðlum.

Þátttakendur á fundinum voru sammála um að á næstu misserum verða breytingar í stjórnsýslu, atvinnulífi og þjónustu á svæðinu hvort sem af sameiningu sveitarfélaganna verður eða ekki. Spurningin sem íbúar standa frammi fyrir er hvort betra sé fyrir samfélagið að takast á við þær breytingar í einu sveitarfélagi eða fjórum. Stöðnun er ekki valkostur.

Fundarfólk var sammála um að í sameiningu sveitarfélaganna væru mörg tækifæri og þá helst í að blása til sóknar í atvinnu- og byggðamálum og bættum samgöngum innan svæðisins og ætta endalausum varnarleik.

Að sama skapi væri mikil óvissa og eðlilegt að fólk hafi áhyggjur af því hvernig þróunin verður. Íbúar óttast að missa áhrif og að dregið verði úr þjónustu, viðhaldi eða framkvæmdum í þeirra nærumhverfi og að fjármál sveitarfélagsins verði ekki nægilega sterk til að byggja upp þjónustu og sækja fram.

Mikilvægt er að varðveita núverandi þjónustu og bæta hana, halda sérstöðu hvers staðar eða byggðakjarna og halda áfram að halda staðbundna menningaratburði eins og þorrablót. Bent var á að í Húnaþingi vestra eru enn haldin fjögur þorrablót og þau skipulögð þannig að fólki geti mætt á þau öll!

Dregið var fram að mikilvægt er að undirbúa allar breytingar vel og upplýsa íbúa, hvort sem það er sameining sveitarfélaga eða sameining skóla.